काठमाडौं । काठमाडौं महानगरपालिकाका स्वतन्त्र उम्मेदवार बालेन्द्र शाह बालेनले मतगणना गर्दा प्रतिनिधि राख्ने विषयमा निर्वाचन आयोगले भेदभाव गरेको बताएका छन् ।

पाँचजना स्वतन्त्र उम्मेदवारको एउटामात्र प्रतिनिधि राख्ने कुरा कानुनी, व्यवहारिक र लोकतान्त्रिक कसीमा हदैसम्म अन्यापूर्ण रहेको बालेनको भनाइ छ ।

‘पाँचजना स्वतन्त्र उम्मेदवारका एकजना साझा प्रतिनिधि भन्ने कुरा कानुनी, व्यवहारिक र लोकतन्त्रको कसीमा हदैसम्मको अन्यायपूर्ण छ र यो लोकतन्त्रको विरुद्धमा छ’, उनले सामाजिक सञ्जालमा लेखेका छन्, ‘यसले विवादको सिर्जना गरेर मतगणना नै शान्तिपूर्ण हुँदैन कि भन्ने शंका उत्पन्न गराउँछ । यसप्रति निर्वाचन आयोग सजग बनोस् ।’

बालेनले हरेक स्वतन्त्र उम्मेदवारलाई आफ्नो प्रतिनिधि मतगणनामा सामेल गराउन आयोगलाई अनुरोधसमेत गरेका छन् ।

‘यसमा निर्वाचन आयोगको ध्यानाकर्षण र तत्काल कार्यान्वयनका लागि अपिल गर्दछु,’ उनले भनेका छन् ।