काठमाडौं । नुवाकोटमा वडाध्यक्षमा निर्वाचित एक व्यक्तिविरुद्ध विशेष अदालतमा आर्थिक अनियमिततासम्बन्धी मुद्दा चलिरहेको रहस्य खुलेको छ । उनीमाथि विशेष अदालतमा ०७६ भदौ २० गतेदेखि मुद्दा चलिरहेको विषयमा सोमबार विदुर नगरपालिका कार्यालयमा उजुरी दर्ता भएको छ ।

गठबन्धन दल माओवादी केन्द्रबाट विदुर–९ को वडाध्यक्षमा निर्वाचित हरिराम भण्डारी मुद्दा चलिरहेकी अवस्थामा निर्वाचित भएको उजुरीमा उल्लेख छ । उनको शपथ ग्रहण रोक्न माग गर्दै सोही वडाका २० जना व्यक्तिहरूले नगरपालिका कार्यालयमा ५७५० नं. मा दर्ता गरेको उजुरीमा उल्लेख छ ।

भण्डारीको विशेष अदालतमा मुद्दा नं. ७६ सिआर ००६३ बाट विशेष अदालत काठमाडौंमा रकम हिनामिनाको मुद्दा सरकारकै तर्फबाट अभियोग दायर भई गत वैशाख २० गते मुद्दा पेसीमा चढी कारबाहीसमेत चलिरहेको उजुरीमा उल्लेख छ । आजको अन्नपूर्ण पोस्ट् दैनिकमा खबर छ ।