काठमाडौं । कांग्रेसले स्थानीय तहको निर्वाचनका लागि घोषणापत्र तयारी समितिको संयोजक महामन्त्री गगन थापालाई बनाएको छ ।

सभापति शेरबहादुर देउवाले केन्द्रीय कार्यसम्पादन समितिको निर्णय अनुसार स्थानीय तहको निर्वाचनको लागि घोषणापत्र तयार गर्ने जिम्मा थापालाई सुम्पेका हुन् ।

‘नेपाली कांग्रेस केन्द्रीय कार्यसम्पादन समितिको २०७८ फागुन ३ गतेको बैठकको निर्णय अनुसार, पार्टी सभापति श्री शेरबहादुर देउवाले पार्टी महामन्त्री श्री गगनकुमार थापालाई ‘स्थानीय तह निर्वाचन–२०७९, घोषणापत्र तयारी समिति’को संयोजक मनोनयन गर्नुभएको छ ।’ पार्टी केन्द्रीय कार्यालयका मुख्य सचिव कृष्णप्रसाद पौडेलद्वारा विज्ञप्तिमा उल्लेख छ ।

थापा १४ औं महाधिवेशनबाट डा. शेखर कोइरालाको तर्फबाट महामन्त्रीमा निर्वाचित भएका थिए । अर्को टिमबाट निर्वाचित भए पनि देउवाले थापालाई महत्वपूर्ण जिम्मेवारी दिएका हुन् ।

स्थानीय तहको निर्वाचन आगामी वैशाख ३० मा हुँदैछ ।