काठमाडौं । अष्ट्रेलियाले युक्रेनमा तीनवटा सशस्त्र सैन्य ट्रक पठाएको छ । गत हप्ता, भोलोदिमिर जेलेन्स्कीको अनुरोधमा अष्ट्रेलियाले युक्रेनलाई कूल २० वटा ट्रक दिने प्रतिबद्धता जनाएको थियो ।

अष्ट्रेलियाबाट पठाइएका यी सवारी साधन युद्धक्षेत्रमा रहेका सैनिक र सर्वसाधारणलाई एक ठाउँबाट अर्को ठाउँमा लैजान प्रयोग गर्न सकिन्छ । यद्यपि, तिनीहरू आक्रमणका लागि प्रयोग गर्न मिल्दैन ।

युक्रेनी राष्ट्रपति जेलेन्स्कीले गत हप्ता अष्ट्रेलियाको संसदलाई भिडियो कन्फरेन्समार्फत सम्बोधन गरेका थिए । जेलेन्स्कीले सम्बोधन गरेको अष्ट्रेलिया २० औं देश हो । अष्ट्रेलियाले युक्रेनलाई १४२ मिलियन डलर सैन्य र मानवीय सहायता उपलब्ध गराउने वाचा गरेको छ ।

यससँगै अष्ट्रेलियाले रुसी सेलिब्रेटी र तेल आयातमा पनि प्रतिबन्ध लगाएको छ । अष्ट्रेलियाका प्रधानमन्त्री स्कट मोरिसनले गत हप्ता राष्ट्रपति जेलेन्स्कीलाई अष्ट्रेलिया युक्रेनको साथमा रहेको बताएका थिए ।