चितवन । नेकपा (माओवादी केन्द्र) का अध्यक्ष प्रचण्डले आइतबारसम्ममा स्थानीय तह निर्वाचन तालमेलको टुंगो लाग्ने बताएका छन् ।

चितवनको भरतपुरमा सञ्चारकर्मीसँग कुरा गर्दै उनले भने, ‘आज बेलुकासम्म सिफारिस गर्ने भनिएकाले भोलिसम्ममा यसबारे टुंगो लाग्नेछ ।’

तालमेलबारे भइरहेको विलम्बबारे उनले एउटै पार्टीभित्र समेत विवाद हुने भएकाले विभिन्न दलबीच सहमतिका लागि समय लाग्ने बताए ।

‘निर्वाचनको समयमा एउटै पार्टीभित्र समेत विवाद, बहस हुन्छ । विभिन्न दलबीच सहमति निर्माणमा समय लाग्नु स्वाभाविक हो,’ उनले भने ।

भरतपुर महानगरपालिकाको मेयर कुन दललाई दिने भन्नेबारे अहिलेसम्म नटुंगिएको र छलफल भइरहेको उनले बताए ।