काठमाडौं । नेकपा (एकीकृत समाजवादी)का अध्यक्ष माधवकुमार नेपालले केपी ओलीलाई बलयगाडा दर्शनका प्रवद्र्धक भएको आरोप लगाए । ओलीको बयान हजार जिब्रा भएका शेष नागले पनि नसक्ने भन्दै आफूले उनको वर्णन गर्न नसक्ने जिकिर गरे ।

‘ओलीले गफमा विद्यावारिधी गरेका छन् । उनी झुटका महागफाडी हुन् । गफ गर्न सिपालु छन्’, चितवनको भरतपुरमा गठबन्धनले गरेको संयुक्त चुनावी सभालाई बिहीबार सम्बोधन गर्दै नेपालले भने, ‘उहाँको गफमा भुल्दा फुर्सदमा पछुताउँनु पर्ला । सबैले सचेत हुन सबैलाई म आग्रह गर्न चाहन्छु ।’

नेपालले गठबन्धन नभएको भए गणतन्त्र समाप्त हुने जिकिर गरे । ओलीको सर्वसत्तावादले संविधान, लोकतन्त्र च्यातिने र मुलुक भ्रष्टाचारमा चुर्लुम्म डुब्ने उनले दाबी गरे । ओली बाहिरबाट हेर्दा राम्रो फर्सी भएपनि भित्र कुहिसकेको टिप्पणी गरे । ओली गफाडीको गफ जस्तो जनतालाई उल्लु बनाउने गठबन्धनले गर्न नहुने उनले बताए ।

उनले भरतपुरमा रेनु दाहालले राम्रो काम गरेकाले गठबन्धनले राम्रो उम्मेदवार छानेको जिकिर गरे । भरतपुरमा दाहाल र चित्रसेन अधिकारीको ‘कम्बिनेसन’ राम्रो भएकाले सबैले सहयोग गर्न आग्रह गरे ।