काठमाडौं । बाजुरामा नेपाली कांग्रेस र नेकपा एकीकृत समाजवादी (नेकपा एस)का कार्यकर्ताबीच झडप भएको छ । जिल्लाको बूढीनन्दा नगरपालिका– ९ मा चुनाव प्रचारप्रसारका क्रममा झडप भएको हो ।

नेकपा एसका कार्यकर्ताले कुकुरलाई हिर्काएको आरोपमा झडप सुरू भएको स्थानीयले बताएका छन् । सोही निहुमा कांग्रेसका कार्यकर्ताले नेकपा एसका कार्यकर्तालाई कुटेका थिए । त्यसपछि नेकपा एसका कार्यकर्ता जिल्ला प्रहरी कार्यालयभित्र प्रवेश गरेका थिए ।

आक्रोशित कांग्रेसका कार्यकर्ताहरूले प्रहरी कार्यालय तोडफोड गरेको जिल्ला प्रहरी कार्यालय बाजुराले जनाएको छ । तोडफोड भएपछि प्रहरी र कांग्रेस कार्यकर्ताबीच झडप भएको थियो । सो क्रममा तीन–तीनजना प्रहरी र कांग्रेस कार्यकर्ता घाइते भएका छन् ।

घटना नियन्त्रणमा लिन प्रहरीले हवाई फायरसमेत गरेको छ ।