काठमाडौं । स्थानीय चुनावका मिति नजिकिएसँगै निर्वाचन आचारसंहिता पनि धमाधम लागू गरिँदैछ । सोहीअन्तर्गत आज रातिबाट मदिरा बेच्न रोक लगाइएको छ ।

स्थानीय तह निर्वाचन निर्देशिका २०७८ को दफा ७१ मा भएको व्यवस्थाको कार्यान्वयन भन्दै निर्वाचन आयोगले आज राति १२ बजेदेखि तोकिएको क्षेत्रमा मादक पदार्थ बिक्री वितरण र सेवन निषेध गरेको छ ।

तर, सबै स्थलमा मदिरा बिक्री वितरण गर्न नपाउने भने होइन । आयोगका अनुसार आज रातिदेखि मतदानस्थलभन्दा तीनसय मिटर दूरीसम्म मदिराजन्य पदार्थ बिक्री वितरण गर्न पाइन छैन । त्यस्तै, मतदानको दिन शुक्रबार भने सबै ठाउँमा मदिरा बिक्री निषेध गरिएको आयोगले जनाएको छ ।

योसँगै आज रातिबाटै निर्वाचन आचारसंहिताअन्तर्गत मौन अवधि लागू हुनेछ ।