काठमाडौं । नेकपा (एमाले) र गोविन्दराज जोशी समूहले तनहुँको व्यास नगरपालिकाको वडा नबर ८ स्थित रिस्तका दुवै बुथमा पुनः मतदान गर्न माग गरेको छ ।

यो ठाउँमा नेपाली कांग्रेसले एकलौटी कब्जा गरेको भन्दै पुनः मतदानको माग गरिएको हो ।

कांग्रेसका मेयर उम्मेदवार वैकुण्ठ न्यौपाने पक्षधर व्यक्तिहरूले मतदान केन्द्र नियन्त्रणमा लिएको सो समूहको आरोप छ ।

गोविन्दराजका छोरासमेत रहेका मेयरका स्वतन्त्र उम्मेदवार दीपकराज जोशीसहित एमालेका मतदान प्रतिनिधिहरूलाई समेत कुटपिट गरेको भन्दै पुनः मतदानको माग गरिएको हो ।

एमालेका राजेश्वर ढकाल र जोशी समूहका हरिशरण पण्डितले संयुक्त विज्ञप्ति जारी गर्दै यस्तो माग गरेका हुन् ।