काठमाडौं । स्थानीय तहको निर्वाचनमा देशभरबाट भटाभट मतपरिणाम आइरहेको छ । जसमा कांग्रेस र एमाले मुख्य प्रतिस्पर्धी देखिएका छन् । देशभरको चुनावी परिणाम र प्रतिस्पर्धाले पनि यही देखाउँछ । परिणाम आएमध्ये कांग्रेसले १३४ ठाउँमा जित्दा १७३ मा अग्रता लिइरहेको छ ।

दोस्रो स्थानमा रहेको एमालेले ८५ तह जित्दा १०३ ठाउँमा अग्रता बनाइरहेको छ । चुनाव अघि नै पालिकामा मुख्य प्रतिस्पर्धी यी दुई दललाई नै ठानिएको थियो । निर्वाचन परिणाम र अग्रताको अंकले पनि यही देखाउँछ । तेस्रोमा माओवादीले ६१ तह जित्दा ५५ ठाउँमा अग्रता बनाइरहेको छ ।

एमालेलाई पछि पार्न सत्ता गठबन्धनमा आवद्ध दल कांग्रेस, माओवादी, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाले मिलेर चुनाव लडेका थिए । महानगर र सबै उपमहानगरपालिकामा लगभग धेरैजसो ठाउँमा तालमेल गरेका थिए । आफूले नजितेका स्थानीय तहमा पनि गठबन्धनले तालमेल गरेका थिए । एमाले हराउने प्रयास स्वरुप दुई सय बढी पालिकामा तालमेल थियो ।

तर केन्द्रकाे सहमति र तालमेल विपरीत कालिकोटको तिलागुफा नगरपालिकामा भने कांग्रेस र एमाले माओवादीलाई हराउन मिलेका थिए । माओवादी हराउन कांग्रेसले मेयर र एमालेले उपमेयरमा उम्मेदवारी दिएका थिए । जहाँ काग्रेसका उम्मेदवार शंकरप्रसाद उपाध्याय २९१६ मत ल्याएर मेयरमा निर्वाचित भएका छन् । कांग्रेस र एमाले मिल्दा माओवादी केन्द्रका दिनेश चँदारा ३८६ मतान्तरले पराजित हुन पुगेका थिए । चँदाराले २,५३० मत ल्याए ।

उपप्रमुखमा पनि कांग्रेससँगको तालमेलमा एमालेका महेन्द्रबहादुर शाही विजयी भए । शाही २७५६ मत ल्याएर विजयी हुँदा पराजित माओवादीका गीताकुमार वली (थापा)ले २४१५ मत ल्याइन् ।

कांग्रेसले एमालेसँग मिलेर जितेको यो अहिलेसम्मको पहिलो स्थानीय तह हाे ।