काठमाडौं । स्थानीय तहको निर्वाचनमा कांग्रेस एक्लैले तीन सय स्थानीय तहको नेतृत्व जितेको छ । देशभरका प्रमुख र अध्यक्ष गरी कांग्रेसले तीन सय पालिकाको नेतृत्व जितेको हो ।

तर दोस्रो स्थानमा रहेको एमाले र माओवादीले पनि तीन सय नै जितेका छन् । एमालेले १८५ र माओवादीले ११५ गरी ठ्याक्कै तीन सय पालिकाको नेतृत्व जितेका हुन् । जुन कांग्रेसको बराबर हो ।

यी तीन दलबाहेक अन्यले २६, जनता समाजवादी पार्टीले २२, नेकपा एकीकृत समाजवादीले १५ र लोकतान्त्रिक समाजवादी पार्टीले १० पालिकाको नेतृत्व जितेको हो ।

२०७४ सालको निर्वाचनमा एमालेले २९४, कांग्रेसले २६६ र माओवादीले १०६ तह जितेका थिए । यसपटक कांग्रेसले पहिले जितेकोभन्दा ३४ पालिका थप जितेको छ । अझै गणनामा २४ ठाउँमा अगाडि पनि छ ।

तर एमालेले पहिलेकोभन्दा ११० तह कम जितेको छ । १७ ठाउँमा अग्रता छ । यी अग्रता लिएको मध्ये १५ मात्रै जित्यो भने पनि एमालेले बल्ल २०० पालिका पुर्याउनेछ । जुन अघिल्लाेपटककाे भन्दा एकसय हाराहारले नै कम हाे ।

माओवादीले पहिले १०६ तह जितेकोमा यसपटक १० तह बढी जितेको छ । अझै ८ तहमा अग्रता बनाइरहेको छ । यस्तोमा पहिलेको भन्दा माओवादीको पनि १५ तह बढी जित हुने देखिएको हो ।