काठमाडौं । गण्डकी प्रदेशका मुख्यमन्त्री, मन्त्री र नेताका बाआमाका स्मृतिमा स्थापित कोषलाई छुट्याइएको बजेट चौतर्फी आलोचनापछि फिर्ता हुने भएको छ । स्मृति कोष, पार्कलगायतमा छुट्याइएको बजेट आमनागरिकको भावनालाई कदर गर्दै प्रदेशको प्राथमिकता क्षेत्रमा खर्च गर्ने व्यवस्था मिलाउन मुख्यमन्त्री कृष्णचन्द्र नेपाली पोखरेलले सम्बन्धित मन्त्रालयलाई निर्देशन दिएका छन् ।

आर्थिक वर्षको बजेटमा मुख्यमन्ख्त्री पोखरेलका बुवा गोवद्र्धन शर्माको स्मृतिमा तनहुँको व्यास नगरपालिका–१० मा स्थापित कोषलाई ५० लाख छुट्याइएको थियो । यस्तै, शिक्षा, संस्कृति, विज्ञान प्रविधि तथा सामाजिक विकासमन्त्री मेखलाल श्रेष्ठका बुवाआमाका नाममा खोलिएको पुननारायण–धनकुमारी श्रेष्ठ परोपकारी कोषमा ५० लाख रूपैयाँ छुट्याइएको छ । मन्त्री श्रेष्ठले सोही कोषको भवन निर्माणका लागि भौतिक पूर्वाधार, सहरी विकास तथा यातायात व्यवस्था मन्त्रालयबाट कार्यान्वयन गर्ने गरी थप ५० लाख रूपैयाँ विनियोजन गरेका छन् ।
असार १ मा प्रस्तुत बजेटमा निर्वाचन क्षेत्र पूर्वाधार विकास कार्यक्रम नसमेटिएपछि अर्थमन्त्री रामजीप्रसाद बराललाई शिक्षा मन्त्री श्रेष्ठले धम्क्याएका थिए । निर्वाचन क्षेत्र पूर्वाधार विकास कार्यक्रम कटाएकामा अर्थमन्त्री बरालसँग मुख्यमन्त्री, अन्य मन्त्री, सत्तारूढ तथा प्रतिपक्षी दलका सांसद रुष्ट थिए । आजको कान्तिपुर दैनिकमा खबर छ ।