काठमाडौं । भारतीय प्रधानमन्त्री नरेन्द्र मोदी नेतृत्वको सरकारले तेस्रो कार्यकालको पहिलो बजेट आज ल्याउँदै छ । वित्त मन्त्री निर्मला सीतारामणले आज बस्न लागेको संसदको बैठकमा बजेट प्रस्तुत गर्न लागेकी हुन् ।

सोमबार उनले आर्थिक सर्वेक्षण २०२३/२४ प्रस्तुत गरेकी थिइन् जसमा २०२४/२०२५ मा भारतको जीडीपी करिब सात प्रतिशतले बढ्ने प्रक्षेपण गरिएको छ ।

त्यसैगरी, आर्थिक वर्ष २०२४/२५ मा मुद्रास्फीति ४ दशमलव ५ प्रतिशतले घटेर आर्थिक वर्ष २०२५/२६ मा ४ दशमलव १ प्रतिशतमा पुग्न सक्ने अनुमान गरिएको छ ।

बजेट अधिवेशनको पहिलो दिन मोदीले ६० वर्षपछि लगातार तेस्रो पटक एकै व्यक्तिको नेतृत्वमा सरकार बनेको र तेस्रो कार्यकालको पहिलो बजेट ल्याउन लागेको जानकारी दिए ।

उनले यो बजेट अमृतकालको महत्वपूर्ण बजेट भएको उल्लेख गर्दै उनले यसले आगामी पाँच वर्षको कामको दिशा तय गर्ने दाबी गरे । यो बजेटले सन् २०४७ को विकसित भारतको पूरा गर्न जग बसाल्ने उनको भनाइ छ ।