काठमाडौं । नेकपा माओवादी केन्द्रका अध्यक्ष पुष्पकल दाहाल प्रचण्डले तत्कालिन नेकपाभित्र आफु शक्तिशाली हुँदै गएपछि आत्तिएर केपी ओलीले संसद विघटन गरेको आरोप लगाएका छन् । पार्टीको राजनीतिक र वैचारिक प्रशिक्षणका लागि आइतबार पोखरा पुगेका उनले नेकपा पुरै प्रचण्डले कब्जा गर्ने देखेर ओली आत्तिएको आरोप लगाए ।

‘तत्कालिन नेकपाभित्र प्रचण्डको पक्षमा जनमत बढ्दै गएपछि ओलीलाई के लाग्यो कुन्नी ? पार्टी नै प्रचण्डले कब्जा गर्न लाग्यो भनेर उनी आत्तिए र त्यसपछि ओली गुटबन्दीमा लागे’, प्रेस सेन्टर नेपालले पोखरामा आयोजित पत्रकार सम्मेलनमा उनले भने, ‘पार्टीभित्र आफ्नो पक्षमा माहोल नदेखेपछि संसद नै विघटन गरे ।

ओलीको जवाफ तपाईंले सुन्नुभएकै छ, पार्टीभित्र मलाई काम गर्न दिएनन् । त्यसैले संसद विघटन गर्दिएँ । त्यस्तो कहिँ हुन्छ ?’ आगामी चुनाव माओवादी केन्द्रका लागि जीवनमरणको सवाल भएकाले आफ्नै बलमा चुनाव जित्नेगरी तयारी गर्न आग्रह गरेका गरे ।

उनले संघीयता विरोधी शक्तिसँग कठोर संघर्ष गर्दै प्राप्त उपलब्धिको रक्षा गर्नु आवश्यक रहेको बताए । पत्रकारलाई प्रतिक्रिया दिँदै अध्यक्ष प्रचण्डले पछिल्लो समय माओवादीप्रति आकर्ष बढ्दै गएकाले आगामी दिनमा माओवादी ठूलो पार्टी बन्ने दावी गरे ।