काठमाडौं । १० दिनअघि बेपत्ता भएका डा. प्रज्वल कोइरालाको शव भेटिएको छ ।

मदन भण्डारी ट्रमा सेन्टर उर्लाबारीमा कार्यरत जनरल सर्जन डा. कोइराला सुनसरी र उदयपुर जोड्ने सप्तकोशी नदीको चतराघाटस्थित पुलमा कार छाडेर १० दिनअघि बेपत्ता भएका थिए ।

झापाको दमक नगरपालिका–१ घर भएका ३८ वर्षीय कोइराला कोशीको पुलबाट प्रदेश १–०२–००२ च ४१६६ नम्बरको कार छाडेर बेपत्ता भएका थिए ।

उनको शव सुनसरीको बराहक्षेत्र नगरपालिका–२ स्थित कोशीले टापु बनाएको क्षेत्रमा भेटिएको प्रहरीले जनाएको छ । सप्तकोसीमा माछा मार्नेहरूले शव तैरिरहेको देखेपछि प्रहरीलाई खबर गरेका थिए ।

कोइरालाले आत्महत्या गर्नुको कारण खुलेको छैन । तर प्रेमिकासँगको विवादका कारण आत्महत्या गरेको बताइए पनि पुष्टि भएको छैन । कोइराला भदौ १० गते सबेरै बिहान २ बजे कोशीको पुलमा आएको सीसी टीभी फुजेटमा देखिएको थियो ।