काठमाडौं । त्रिकोणात्मक टि–२० सिरिजअन्तर्गत आज भएको समूह चरणको खेलमा नेपालले आज मलेसियालाई ८५ रनको फराकिलो अन्तरले हराएको छ ।

यससँगै नेपाल ४ खेलमा शतप्रतिशत जित निकाल्दै फाइनलमा प्रवेश गरेको छ ।

आज नेपालले आक्रामक ब्याटिङ गर्दै २२३ रन बनाएको थियो । यस क्रममा दीपेन्द्रसिंह ऐरीले आक्रामक शतकीय पारी खेले । यससँगै नेपालले टि–ट्वान्टी अन्तर्राष्ट्रिय क्रिकेटको तेस्रो ठूलो स्कोर बनाएको थियो ।

दीपेन्द्रले अविजित रहँदै ११० रनको इनिङ खेले । उनले ५७ बलमा १० चौका र ६ छक्का प्रहार गरे । दीपेन्द्रले टि–ट्वान्टी अन्तराष्ट्रियमा पहिलो शतक पूरा गरेका हुन् । उनको यो स्कोर नेपाली खेलाडीको एक इनिङको व्यक्तिगत धेरै रन हो ।

यस्तै दीपेन्द्र टि–ट्वान्टी अन्तर्राष्ट्रिय क्रिकेटमा र एकदिवसीय अन्तर्राष्ट्रिय क्रिकेटमा शतक पूरा गर्ने दोस्रो नेपाली खेलाडी बनेका छन् ।

यसैगरी आज रोहित पौडेलले पनि टि–ट्वान्टी अन्तर्राष्ट्रिय क्रिकेटमा आफ्नो पहिलो अर्धशतक पूरा गरेका छन् । रोहितले ३४ बलमा ५ चौकाको मद्दतमा ५१ रन बनाएका हुन् ।

मलेसियालाई ८५ रनले हराएको नेपाल अपराजित रहँदै फाइनलमा