काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डकी बुहारी सिर्जना त्रिपाठी पोखरा महानगरपालिकाको उपप्रमुख (उपमेयर)को उम्मेदवारमा सिफारिस भएकी छिन् ।

महानगर कमिटीको आज बसेको पूर्ण बैठकले आसन्न स्थानीय तह निर्वाचनका लागि उनलाई पोखराको उपमेयरमा सिफारिस गरेको हो ।

उपप्रमुखमा तीन जनाको नाम सिफारिस गर्दा सिर्जनाको नामसमेत परेको हो ।

सिर्जना प्रचण्डपुत्र प्रकाशकी माइली श्रीमती हुन् । माओवादीका नेता पोष्टबहादुर बोगटीकी छोरी प्रभासँग सम्बन्ध बिच्छेद भएपछि प्रकाशले सिर्जनासँग मागी विवाह गरेका थिए ।

पछि पुन प्रकाशले वीना मगरसँग तेस्रो विवाह गरे । प्रकाशको ०७४ मा निधन भइसकेको छ ।

सिर्जना माओवादीको जन वर्गीय सङ्गठन अखिल नेपाल महिला सङ्घ (क्रान्तिकारी) की केन्द्रीय सदस्य हुन् । केही वर्षयता उनी पोखरामा बसेर पार्टी राजनीतिमा सक्रिय छिन् ।