काठमाडौं । स्थानीय निर्वाचनका उम्मेदवारको भागबण्डा मिलाउन बसेको सत्तारुढ पाँचदलीय गठबन्धनको बैठक विनानिष्कर्ष टुंगिएको छ ।

प्रधानमन्त्री निवास बालुवाटारमा बसेको आजको बैठकमा सहमति जुट्न नसकेको हो ।

६ वटा महानगरपालिका र ११ वटा उपमहानगरपालिकाको प्रमुख र उपप्रमुखबारे गठबन्धनमा सहमति जुट्न नसकेपछि आज दुईपटक बैठक बसेको हो ।

आज सहमति जुट्न नसके पनि आफूहरू सहमतिनजिक पुगेको बैठकमा सहभागी कांग्रेस नेता तथा सञ्चारमन्त्री ज्ञानेन्द्रबहादुर कार्कीले बताए ।

सहमतिका लागि मंगलबार साढे ११ बजे गठबन्धनको बैठक पुनः बस्ने उनले जानकारी दिए ।

‘हामी सहमतिको नजिक पुगेका छौं । भोलि फेरि बैठक बस्नेछ, त्यसपछि मैले तपाईँहरुलाई सहमतिको खाका सुनाउनेछु’, बैठकपछि प्रतिक्रिया दिँदै उनले भने ।

बैठकमा माओवादी केन्द्र र नेकपा एसले धेरै उपमहानगरपालिकामा भागबण्डा खोजेपछि सहमति नभएको बताइएको छ ।

गठबन्धनको बैठक चलिरहँदा अमेरिकी राजदूत बालुवाटारमा !