काठमाडौं । नेपाली कांग्रेसका महामन्त्री गगन थापाले नेकपा (एमाले)का अध्यक्ष केपी शर्मा ओलीलाई जवाफ फर्काएका छन् ।

कांग्रेसको घोषणापत्रमाथि टिप्पणी गर्दै ओलीले ‘पागलहरूको प्रलाप’ भनेको विषयलाई लिएर उनले बुधबार जवाफ फर्काएका हुन् ।

महामन्त्री थापाले कांग्रेसको घोषणापत्रले एमाले अध्यक्ष ओलीको झुटको खेतीलाई चुनौती दिएको बताउँदै सोही सहन नसकेर उनले आफूहरूलाई ‘पागल’ भएको टिप्पणी गरेका छन् ।

बुधबार पार्टीको सम्पर्क मञ्चले आयोजना गरेको कार्यक्रममा कांग्रेस महामन्त्री थापाले जवाफ फर्काएका हुन् ।

सो अवसरमा उनले झुटको खेतीलाई चुनौती दिनेहरूलाई पागल भन्ने ओलीलाई बानी परिसकेको आरोप लगाए ।

‘आफ्नो झुटलाई च्यालेन्ज गर्नेलाई उहाँले विगतमा पनि पागल भन्नुभएको थियो,’ उनले भने, ‘उहाँले अहिले पनि झुटलाई च्यालेन्ज गर्नेलाई पागल भन्नुभयो ।’

महामन्त्री थापाले ओलीलाई तर्क (लजिक) मन नपर्ने र जादु (म्याजिक) मात्र मन पर्ने आरोप लगाउँदै कांग्रेसको घोषणापत्रमा लजिक मात्र भएकाले उनलाई मन नपरेको हुनसक्ने टिप्पणी गरे ।

‘केपी ओलीलाई लजिक मन पर्दैन, म्याजिक मन पर्छ । हामीले लजिक राखेका छौं, म्याजिक छैन । त्यसैले उहाँलाई मन नपरेको हो,’ उनले भने ।

मंगलबार एमाले अध्यक्ष ओलीले एक कार्यक्रममा कांग्रेसको घोषणापत्रमाथि टिप्पणी गर्दै ‘पागलहरूको प्रलाप’ भनेका थिए ।

महामन्त्री थापाले बुधबार त्यसैको जवाफ दिएका हुन् ।

कांग्रेसको घोषणापत्र पागलहरूको प्रलाप हो : केपी ओली