काठमाडौं । नेकपा (एमाले)को तर्फबाट काठमाडौं महानगरपालिकाको मेयरमा उम्मेदवारी दिएका केशव स्थापितले स्वतन्त्र उम्मेदवार बालेन शाहलाई जातीय पहिचान लुकाएको आरोप लगाएका छन् ।

काठमाडौंमा आइतबार आयोजित एक कार्यक्रममा स्थापितले बालेन तराई–मधेसको साह भएको बताए । बालेनले राजनीति गर्न आफूलाई पहाडिया ठकुरी शाह बनाएको उनको भनाइ थियो ।

‘बालेन आफूलाई म काठमाडौंमा जन्मेको, पहाडिया ठकुरी भन्छ । हिजो के कुरा खुल्यो ऊ यहाँको शाह रहेनछ, मधेसतिरको साह रहेछ ।’

स्थापितले आफू मधेसको मानिस हुँ भन्ने आँट गरेर चुनावी मैदानमा आउन चुनौतीसमेत दिए ।

‘सुरुवातमै ठग कुरा गर्ने मान्छेको हालत अब के हुन्छ हेरौं ! म मधेसको मान्छे भनेर आँट गरेर आउनुपर्दैन ?’ उनले भने ।

स्थापितले बालेनमाथि विभिन्न अराजनीतिक टिप्पणीसमेत गरेका थिए ।