काठमाडौं । स्थानीय तहको निर्वाचन प्रचारप्रसारको अन्तिम दिन कांग्रेस महामन्त्रीद्वय गगन थापा र विश्वप्रकाश शर्माले संयुक्त भिडियो सन्देश जारी गरेका छन् ।

मौन अवधि सुरु हुनु अघि थापा र शर्माले हामी तपाईंलाई नै सोध्न चाहन्छौं । तपाईं कस्तो समाज चाहनुहुन्छ ? तपाईं राजनीति कस्तो बनोस् भन्ने चाहनहुन्छ ? एकपटक सँगै सोच्न आग्रह गर्छौ । मतदान गर्ने अधिकार त्यसै पाइएको होइन सित्तै आएको होइन भन्दै समाजलाई बदल्न चाहन्छौं भनेका छन् ।

रुखमा मतदान गरेको भनेर पश्चाताप मान्नुपर्ने अवस्था नआउने भन्दै उनीहरूले मत दिन आग्रह गरेका छन् । समुन्नतिको लागि, संविधानलाई बलियो बनाउने, समाजलाई बदल्ने प्रतिवद्धता उनीहरूले व्यक्त गरेका छन् ।

यो भिडियो ‘प्रविधिमैत्री कांग्रेस अभियान’ अन्तर्गत कांग्रेसले गठन गरेको कांग्रेस वाइड इन्फरमेसन नेटवर्क (एनसी विन)मार्फत् आएको हो । कांग्रेसका प्रभावशाली नेताद्वयको संयुक्त यो भिडियो सम्भवतः पहिलो हो । थापा र शर्मा १४ औं महाधिवेशबाट कांग्रेसको महामन्त्रीमा चुनिएका थिए ।