काठमाडौं । विपक्षीलाई हराएर जितेको नतिजा एकपछि अर्को गरी आइरहँदा जुम्लाबाट भने फरक समाचार आएको छ । जुम्लाको चन्दननाथ नगपालिकामा कांग्रेसका बागीले कांग्रेसलाई नै हराएर मेयर पद हत्याएका छन् ।

पार्टीले टिकट नदिएपछि कांग्रेसकै राजुसिंह कठायतले कांग्रेसका आधिकारिक उम्मेदवारलाई पराजित गरेका हुन् ।

कठायतले २४०३ मत ल्याउँदा पराजित कांग्रेसका आधिकारिक उम्मेदवार पदमबहादुर शाहीले २३४१ मत ल्याएका हुन् । शाही ६२ मतले पराजित भएका हुन् ।

२०७४ सालमा चन्दननाथमा कान्तिका सेजुवालले मेयर जितेकी थिइन् । कांग्रेसका आधिकारिक उम्मेदवार मेयरमा नजिते पनि उपमेयरमा कांग्रेसकी रामदेवी खड्का विजयी भइन् ।

कठायतले धाराे चुनाव चिन्हबाट मेयर जितेका हुन् । चितवनको भरतपुरमा पनि कांग्रेसले टिकट नदिएपछि स्वतन्त्रबाट जगन्नाथ पौडेलले उम्मेदवारी दिएका छन् ।

मेयरमा विजयी हुने कठायत पूर्वमन्त्री अदनसिंह कठायतका छोरासमेत हुन् । अदनसिंह पञ्चायतकालमा मन्त्री बनेका थिए ।

राप्रपामा छँदा २०५४ सालमा स्थानीय तहकै निर्वाचनमा टिकट नपाएपछि सिंहले स्वतन्त्रबाट जितेका थिए ।