काठमाडौं । काठमाडौं महानगरपालिकाको मेयरको मतगणना जारी रहँदा बालेन शाहले ३० हजार मत कटाएका छन् ।

स्वतन्त्र उम्मेदवार बालेनले दोस्रो स्थानका एमालेका केशव स्थापित र तेस्रो स्थानकी गठबन्धनको तर्फबाट कांग्रेकी उम्मेदवार सिर्जना सिंहलाई धेरै पछि छोडेका छन् ।

बालेन स्थापितभन्दा १४५२१ मतको फराकिलो मतले अगाडि छन् ।

बालेनले ३०८५८ मत ल्याएका छन् भने स्थापितले १६३३७ मत प्राप्त गरेका छन् ।

तेस्रो स्थानमा रहेकी कांग्रेसकी सिर्जनाले १५९६० मत ल्याएकी छिन् ।

काठमाडौंको बाहिरी क्षेत्रबाट सुरु भएको गणनामा बालेनले सुरुवातीदेखि नै भारी मतको अग्रता बनाइरहेका छन् । बिहीबारदेखि थोरै भित्री क्षेत्रको गणना सुरु भएको छ ।

नेवार बाहुल्य वस्तीमा गणना सुरु भएकाले अब बालेनको वास्तविक परीक्षा सुरु भएको केहीथरी विश्लेषकहरूको भनाइ छ । यद्यपि, ती क्षेत्रमा पनि बालेनलाई सन्तुलित मत आइरहेको जनाइएको छ ।

काठमाडौं महानगरका ३२ वडामध्ये हालसम्म १,२,३,४,५, ८, २८, ३० र ३२ वडामा मतगणना सकिइसकेको छ ।