काठमाडौं । कप्तानी गरिरहेका रोहितकुमार पौडेलले शतकीय पारी खेलेपछि नेपालले अमेरिकी क्लबविरुद्ध जित निकालेको छ ।

आइसिसी पुरुष क्रिकेट विश्वकप लिग २ अन्तर्गतको सिरिजका लागि अमेरिकामा रहेको नेपाली राष्ट्रिय क्रिकेट टोलीले अभ्यास खेल जित निकालेको छ ।

गएराति अमेरिकामा भएको खेलमा नेपालले टेक्ससको ह्युस्टन हरिकेन्सलाई २९ रनले हराएको हो ।

टस हारेर ब्याटिङ गरेको नेपालले ४९.१ ओभरमा अलआउट हुँदै २५० रन जोड्यो । नेपालको सम्मानजनक योगफलमा रोहितले १०१ रनको शतकीय पारी खेले ।

यस्तै आरिफ शेखले ४१, दीपेन्द्रसिंह ऐरीले २४, देव खनालले १९ सुनिल धमलाले १३ र करण केसी १२ रन बनाए ।

नेपालले दिएको २५१ रनको लक्ष्य पछ्याएको हरिकेन्स ४३ ओभर ३ ओभरमा अलआउट हुँदै २२१ रन जोड्न सक्यो ।

नेपालका सोमपाल कामीले ५, तथा किशोर महतो र सागर ढकालले २-२ विकेट लिए ।

यसअघि नेपालले नेपालका पूर्वखेलाडीहरू वसन्त रेग्मी र पृथु बाँस्कोटाको क्लब अल स्टार्ससँग अभ्यास खेलेको थियो । अल स्टार्ससँग नेपाल ४ विकेटको हारेको थियो ।

सिरिजमा नेपालले अमेरिका र ओमानसँग प्रतिस्पर्धा गर्नेछ ।

नेपाली क्रिकेट टोली अमेरिकाको अल स्टार्ससँग पराजित – NepalWatch