काठमाडौं । भारतले दक्षिण अफ्रिकाविरुद्धको तीन खेलको एकदिवशीय अन्तर्राष्ट्रिय क्रिकेट शृंखला २-१ ले जितेको छ । तेस्रो, अन्तिम तथा निर्णायक खेलमा बिहीबार भारत ७८ रनले विजयी भयो ।

भारतले दिएको २९७ रनको लक्ष्य पछ्याएको दक्षिण अफ्रिका ४५.५ ओभरमा २१८ रनमै अलआउट भय‍ो।

पहिला ब्याटिङ गरेको भारतले निर्धारित ५० ओभरमा ८ विकेट गुमाएर २ सय ९६ रन जोड्यो । सन्जु सामसनले एक सय ८, तिलक वर्माले ५२ र रिंकु सिंहले ३८ रन बनाए। सन्जुले एक सय १४ बलमा ३ छक्का र ६ चौका प्रहार गरे। उनले चौथो विकेटका लागि तिलकसँग एक सय १३ रनको साझेदारी गरेका थिए ।

दक्षिण अफ्रिकाका लागि टोनी जोर्जीले ८१ रन जोडे र ऐडेन मक्रमले ३६ रन बनाएपनि जितका लागि पर्याप्त हुन सकेन ।

बलिङमा भारतका अर्शदिप सिंहले ४ विकेट लिए तथा आभेश खान र वासिङ्टन सुन्दरले २/२ विकेट लिए ।

शृंखलाअन्तर्गत पहिलो खेलमा भारत र दोस्रो खेलमा दक्षिण अफ्रिका विजयी भएको थियो ।