काठमाडौं । क्यानडाविरुद्धको तीन एकदिवसीय सिरिजअन्तर्गतको जारी पहिलो खेलमा नेपालले क्यानडासामु २२५ रनको लक्ष्य प्रस्तुत गरेको छ ।

बिहीबार कीर्तिपुरस्थित त्रिवि मैदानमा टस जितेर पहिले ब्याटिङ रोजेको नेपालले ५० ओभरमा सबै विकेट गुमाउँदा २२४ रन जोड्यो।

नेपालका लागि ओपनर कुशल भुर्तेलले अर्धशतक प्रहार गर्दै ५८ बलमा ९ चौका र १ छक्का प्रहार गर्दै ६२ रन जोडे। त्यस्तै, आरिफ शेखले दोस्रो सर्वाधिक ३८ रनको योगदान गरे ।

कुशलका ओपनिङ पार्टनर आसिफ शेख ८ रनमै आउट भए भने कप्तान रोहितकुमार पौडेलले पनि ८ रनभन्दा बढी जोड्न सकेनन्। यस्तै भीम सार्की १७ रन र कुशल मल्लले पनि २० बनाउँदै आउट भए ।

पवन सर्राफ पनि १५ रन जोड्दा आउट भए भने सोमपाल कामीले २७ रनको योगदान दिए जुन नेपालका लागि महत्वपूर्ण सावित भयो। ४९ ओभरको पाँचौं बलमा आउट हुनुअघि उनले २३ बलमा १ चौका र २ छक्का प्रहार गरे।

नेपाली टिमबाट एकदिवसीय खेलमा डेब्यू गरेका रिजन ढकाल अन्तिम ओभरमा ४ रनमा आउट भए भने सूर्य तामाङ १० रनमा नटआउट रहे।