काठमाडौं । आगामी महिना अमेरिका र वेष्ट इन्डिजमा हुने टी–२० विश्वकप क्रिकेट खेल्ने नेपाली टोलीको घोषणा भएको छ । क्रिकेट संघ नेपालले बुधबार टोली टुंगो लगाएको हो ।
टोलीमा युवा खेलाडीहरु कमलसिंह ऐरी र सागर ढकालले समेत स्थान बनाएका छन् ।

कप्तान रोहित पौडेल नेतृत्वको टोलीमा आसिफ सेफ, कुशल भुर्तेल, कुशल मल्ल, दीपेन्द्रसिंह ऐरी, गुल्सन झा,  करण केसी, ललित राजबंशी,सोमपाल कामी, प्रतिश जिसी, सन्दीप जोरा, अभिनास बोहरा समेत छन् ।

विश्वकप क्रिकेट आगामी १ जुनदेखि सुरु हुँदैछ। २० टिम सहभागी हुने विश्वकपमा अन्तिम टोली घोषणा गर्ने बुधबार अन्तिम दिन हो।

टी-२० विश्वकप २०२४ मा नेपाल समूह ‘डी’ मा छ। समूहमा नेपालले दक्षिण अफ्रिका, श्रीलंका, बंगलादेश र नेदरल्यान्ड्ससँग प्रतिस्पर्धा गर्नेछ।

नेपालले पहिलो खेल नेदरल्यान्ड्ससँग जुन ४ मा अमेरिकाको डालास र जुन ११ मा श्रीलंकासँग अमेरिकाकै फ्लोरिडामा प्रतिस्पर्धा गर्नेछ। बाँकी खेलहरु जुन १४ मा दक्षिण अफ्रिकासँग र जुन १६ मा हुने बंगलादेशसँग सेन्ट भिसेन्टमा हुनेछ।

विश्वकपको समूह चरणका खेल जुन १ देखि १८ सम्म हुनेछन्। त्यसपछि १९ देखि २४ जुनसम्म सुपर-८ हुनेछ। सेमिफाइनल २६ र २७ जुनमा हुनेछ भने फाइनल २९ जुनमा हुनेछ।