काठमाडौं । टी–२० विश्वकप क्रिकेटको सुपर–८ अन्तर्गतको खेलमा अस्ट्रेलियाले बंगलादेशमाथि जित हासिल गरेको छ । वर्षाले निर्धारित २० ओभरको खेल ११.२ ओभरबाट अघि बढ्न नसकेपछि डिएलएस पद्धतिका आधारमा अस्ट्रेलियालाई विजयी घोषित गरिएको हो ।

पहिले टस हारेर ब्याटिङ सम्हालेको बंगलादेशले अस्ट्रेलियालाई १४१ रनको लक्ष्य दिएको थियो । उक्त लक्ष्यलाई अस्ट्रेलियाले सहज ढंगले पछ्याइरहेका बेला दुई पटक वर्षाले खेल अवरुद्ध बनेको थियो । पहिलो पटकको वर्षा रोकिएपछि खेल सुरु भए पनि ११.२ ओभरमा फेरि पानी परेर खेल अवरुद्ध भयो । वर्षा अन्त्यपछि बाँकी खेल खेलाउने तयारी गरिए पनि वर्षा नरोकिएपछि डिएलएस विधिबाट अस्ट्रेलियालाई विजय घोषित गरिएको हो ।

अष्ट्रेलियाविरुद्ध टस हारेर पहिले ब्याटिङ गरेको बंगलादेशले निर्धारित २० ओभरमा ८ विकेटको क्षतिमा १४० रन बनाएको थियो । त्यसलाई पछ्याएर अघि बढेको अस्ट्रेलियाले ११.२ ओभरमा मात्रै दुई विकेट गुमाएर १०० रन जोडेको थियो ।