काठमाडौं । फ्रेन्च कपको यस सिजनको उपाधि पेरिस–सेन्ट जर्मेन (पिएसजी) को पोल्टामा परेको छ । शनिबार सम्पन्न फाइनल खेलमा लियोनलाई २–१ गोलमा परास्त गर्दै पिएसजीले उपाधि सुरक्षित गरेको हो ।

पीएसजीका लागि विंगर उस्माने डेम्बेले र फाबियन रुइजले १–१ गोल गरे । डेम्बेलेले खेलको २२औं मिनेटमा गोल गर्दै टिमलाई सुरुवाती अग्रता दिलाए । नुनो मेन्डेसको क्रसमा उनले गोल गरेका हुन् ।

त्यस्तै, ३४औं मिनेटमा रुइजले गोल गर्दै अग्रता दोब्बर बनाए । दोस्रो हाफमा पिएसजीले गोलका लागि केही अवसर सिर्जना गरेको थियो । तर लियोनका गोलरक्षकले उत्कृष्ट प्रदर्शन गर्दै गोल हुन दिएनन् ।

पिएसजीका लागि केलियन एमबाप्पेले बिदाइ खेल खेले पनि उनले कुनै गोल गर्न सकेनन् ।

दोस्रो हाफमा लियोनले १ गोल गरे पनि त्यो सान्त्वना गोलमा मात्र सीमित भयो ।

पिएसजीको फ्रेन्च कपमा यो १५औं जित हो ।