काठमाडौं । निर्वाचन आयोगले पूर्वप्रधानमन्त्री तथा जसपाका संघीय परिषद् अध्यक्ष डा. बाबुराम भट्टराईले मतदान गरेको मतदान केन्द्रका मतदान अधिकृतलाई समेत स्पष्टीकरण सोधेको छ ।

भट्टराईलाई मतदान गर्दागर्दैका तस्बिर खिच्न दिएको आरोपमा मतदान अधिकृत प्रदीपकुमार रुपाखेतीलाई स्पष्टीकरण सोधिएको आयोगका एक अधिकारीले बताए ।

यसअघि भट्टराईले निर्वाचन आचारसंहिता उल्लंघन गरेको भन्दै निर्वाचन आयोगले स्पष्टीकरण सोधेको थियो ।

छाप लगाएकोसमेत देखिनेगरी मतदान गर्दागर्दैका तस्बिरहरू सामाजिक सञ्जालमा राखेर उनले आचारसंहिता विपरीतको काम गरेको भन्दै आयोगले २४ घण्टाभित्र जवाफ दिनू भनेर उनका नाममा पत्रसमेत काटिसकेको छ ।

भट्टराईले शुक्रबार गोरखाको पालुङटार नगरपालिका–१ अन्नपूर्ण माविको मतदान केन्द्रबाट मतदान गरेपछि तस्बिरहरू सामाजिक सञ्जालमा राखेका थिए ।

‘बाबुरामलाई मात्र होइन मतदान अधिकृतलाई समेत कारबाही हुन्छ’ – NepalWatch