NepalWatch

News Portal For Eeverything In Nepal from Nepal

२०८० फागुन ११ गते

नेता–कार्यकर्तालाई माधवको निर्देशन : एमसिसीविरुद्ध लेखेका स्टाटस मेटाउनू

काठमाडौं । नेकपा (एकीकृत समाजवादी)का अध्यक्ष माधवकुमार नेपालले अमेरिकी परियोजना एमसिसीविरुद्ध नबोल्न नेता–कार्यकर्तालाई कडा निर्देशन दिएका छन् ।

बुधबारदेखि काठमाडौंमा सुरु भएको पार्टीको केन्द्रीय कमिटीको बैठकलाई सम्बोधन गर्दै उनले यस्तो निर्देशन दिएका हुन् ।

नेता नेपालले एमसिसीविरुद्ध पहिले सामाजिक सञ्जालमा लेखेका विचार र प्रतिक्रिया पनि मेट्न आग्रह गरेका छन् ।

’पार्टीको समर्थनमा एमसिसी संसद्बाट पास भइसकेको छ । यसबारे पार्टीले औपचारिक निर्णय पहिले नै गरिसकेको छ’, नेपालले भने, ’पार्टीको निर्णय सबैलाई बाध्यकारी भएकाले एमसिसीविरुद्ध पहिले नै लेखिएका स्टाटस अब मेटाउनुस् ।’

सत्तारुढ माओवादी केन्द्र र एकीकृत समाजवादी एमसिसीका विपक्षमा थिए । तर, संसद्बाट १२ बुँदे व्याख्यात्मक टिप्पणी पारित गर्दै उनीहरूले एमसिसी पारित गर्न सघाए ।

व्याख्यात्मक घोषणापछि एमसिसीसम्बन्धी विवाद हटेकाले आफूहरूले संसद्बाट पारित गर्न सघाएको नेता नेपालले स्पष्ट पारे ।

केन्द्रीय कमिटी बैठकमा अध्यक्ष नेपालले राजनीतिक प्रतिवेदनसमेत पेश गरेका छन् ।