काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले कांग्रेसले पेल्न खोजे चुनावमा एमालेसँग सहकार्य हुन सक्ने संकेत गरेका छन् ।

राजनीतिक तथा वैचारिक प्रशिक्षणका लागि बिहीबार लुम्बिनी प्रदेश पुगेका प्रचण्डले एमालेसँग तालमेल गर्ने वा नगर्नेबारे कांग्रेसको व्यवहारमा भरपर्ने प्रतिकृया दिए ।

‘हामी चुनावसम्म गठबन्धनको पक्षमा छौं । तत्काल एमालेसँग सहकार्यको कुनै सम्भावना छैन । प्रतिगमनको विरुद्ध अहिलेको गठबन्धन बनेको हुनाले कम्तिमा चुनावसम्म गठबन्धन कायमै रहोस् भन्ने पक्षमा छौ’, पत्रकारसँग प्रतिकृया दिँदै उनले भने, ‘कांग्रेसले पेल्न वा हेप्न खोजे एमालेसँग सहकार्य नहोला भन्न सकिदैन । कांग्रेसका केही साथीहरूले चुनावी तालमेल गर्नै हुन्न भनेका छन् । त्यो कांग्रेसकै व्यवहारमा भर पर्छ ।’

उनले चुनाव हुँदैन कि भन्ने कुनै भ्रम नराख्न आग्रह गर्दै गठबन्धनको भर नपरी आफ्नै खुट्टामा उभिने गरी चुनावी तयारीमा जुट्न निर्देशन दिएका छन् ।