काठमाडौं । नेकपा (माओवादी केन्द्र)का अध्यक्ष पुष्पकमल दाहाल प्रचण्डले आफ्नो मन्त्रीहरूलाई फिर्ता बोलाउन सक्ने संकेत गरेका छन् ।

पार्टीको राजनैतिक तथा वैचारिक प्रक्षिणका लागि मंगलबार मधेस प्रदेश झरेका उनले माओवादीबाट मन्त्री बनेकालाई फिर्ता बोलाउने संकेत गरेका हुन् ।

‘मन्त्रिपरिषद्मा मन्त्री हेरफेरको कुरा चलेको त छ तर अहिलेसम्म औपचारिक ढंगले टुंगिएको छैन’, प्रेस सेन्टर मधेस प्रदेशले आयोजना गरेको पत्रकार सम्मेलनमा प्रचण्डले भने, ‘केही मन्त्रालय हेरफेर हुने सम्भावना छ । केही नयाँ आउने सम्भावना पनि छ । मैले प्रधानमन्त्रीसँग भनिराखेको छु । सरकार बनाउन माओवादी पार्टीले जति त्याग गरेको छ, सोअनुसार माओवादीले मन्त्री पाएको छैन ।’

मन्त्रिपरिषद् हेरफेर हुने भयो भने आफूहरूको हैसियतअनुसार मन्त्रालय चाहिन्छ भनेर प्रधानमन्त्री शेरबहादुर देउवालाई भनिसकेको प्रचण्डले बताए ।

‘जवाफमा उहाँले हुन्छ भन्नुभएको छ ’, उनले भने ।