काठमाडौं । इंग्ल्याण्डकी डिफेन्डर लुसी ब्रोन्ज बार्सिलोनामा अनुबन्ध भएकी छन् ।

उनी फ्रि ट्रान्सफरमा दुई वर्षका लागि अनुबन्ध भएको स्पेनिस क्लबले शनिबार जनाएको छ । बार्सिलोनाले लुसीको तस्बिर राख्दै ट्विटरमा लेखेको छ– तपाईंलाई नयाँ घरमा स्वागत छ ।

लुसीको म्यानचेस्टर सिटीसँगको सम्झौता यही जुनको अन्त्यमा सकिँदै थियो । म्यानचेस्टर सिटीले गत मेमा नै सम्झौता सकिएपछि ३० वर्षीया लुसीले क्लब छाड्ने जनाएको थियो ।

उनी सन् २०२० मा दोस्रो पटक म्यानचेस्टर सिटीमा आबद्ध भएकी थिइन् ।

विश्वकै ठूलोमध्ये एक टिम बासिलोनामा आबद्ध भएर खेल्न पाउने अवसर पाउँदा म निकै खुसी भएकी छु । म साँच्चै टिमसँग काम सुरु गर्न चाहन्छु,’ उनले भनेकी छन् ।

ब्रेन्ज सन् २०२० को महिलातर्फको उत्कृष्ट फिफा खेलाडी हुन् ।