काठमाडौं । म्यानचेस्टर युनाइटेडले क्रिस्टल प्यालेससँग लज्जास्पद हार चाखेको छ । इग्लिस प्रिमियर लिगअन्तर्गत गएराति सम्पन्न खेलमा युनाइटेडले ४–० गोलान्तरको फराकिलो हार ब्यहोरेको हो ।

म्यानचेस्टर युनाइटेड निकै दबाबमा परेको खेलमा क्रिस्टल प्यालेसका लागि माइकल ओलिसले १२औं मिनेटमा पहिलो गोल गरे । डेनियल मुनोजको पास सदुपयोग गर्दै उनले आफ्नो टिमलाई सुरुआती अग्रता दिलाएका हुन् ।

त्यसैगरी, ४०औं मिनेटमा जिन फिलिप मटेटा, ५८औं मिनेटमा टायरिक मिचेल र ६६औं मिनेटमा ओलिसले क्रिस्टलका लागि समान १–१ गोल गरे ।

योसँगै क्रिस्टल प्यालेस ३६ अंक जोडेर १४औं स्थानमा छ भने ५४ अंक रहेको युनाइटेड आठौं स्थानमा छ ।