NepalWatch

News Portal For Eeverything In Nepal from Nepal

२०८१ असार ३० गते

विश्वकपबाट पाकिस्तान बाहिरियो

काठमाडौं । अमेरिका र वेष्ट इन्डिजमा जारी टी–२० क्रिकेट विश्वकपमा समूह चरणबाटै पाकिस्तान बाहिरिएको छ । शुक्रबारको अमेरिका र आयरल्याण्डबीचको खेल हिलो मैदानका कारण रद्द भएपछि पाकिस्तान बाहिरिएको हो । यदी यो खेलमा अमेरिका पराजित भएको अवस्थामा पाकिस्तानको सम्भावना बाँकी रहन्थ्यो।

साथै, अमेरिका सुपर आठमा पुगेको छ । समूह ए मा बाट यसअघि भारत सुपर आठमा पुगिसकेको छ । दुई खेल जितेको अमेरिका खेल स्थगित भएसँगै थप एक अंक पाएर सुपर ८ मा पुगेको हो ।

पहिलो खेलमा पाकिस्तान अमेरिकासँग सुपर ओभरमा पराजित भएको थियो भने दोस्रो खेलमा भारतसँग । तेस्रो खेलमा उसले क्यानडालाई जितेको थियो । अर्काे खेल जितेपनि पाकिस्तानको चार अंक मात्र हुने भएपछि पाकिस्तान एक खेल अगाडि नै बाहिरिएको हो । पाकिस्तानको अन्तिम खेल आयरल्याण्डसँग छ ।