काठमाडौं । भारत र श्रीलंकाबीचको पहिलो एकदिवसीय खेल नाटकीय रुपमा बराबरी भएकोमा दोस्रो खेलमा भारतले अप्रत्याशित हार बेहोरेको छ । श्रीलंकाका बलर जेफ्री भ्यानडर्सी एक्लैले भारतका ६ विकेट ढालेपछि श्रीलंका ३२ रनले विजयी भएको हो ।

टस जितेर सुरुमा ब्याटीङ गरेको श्रीलंकाले २४१ रनको लक्ष्य दिएको थियो । भारत ४२.२ ओभरमा २०८ रन बनाउँदै अलआउट भयो ।

तर, दोस्रो इनिङको सुरुवात भारतले यस्तो सशक्त गरेको थियो कि श्रीलंकाको जितको सम्भावना ज्यादै न्यून देखिन्थ्यो । ओपनर रोहित शर्मा र शुभमन गिलले १३.३ ओभरमा ९७ रनको साझेदारी गरेका थिए । ४४ बलमा ६४ रन बनाएका कप्तान रोहितको विकेटपछि भारतका ब्याट्सम्यानहरु लगातार आउट भए । अक्सर पटेलले ४४ बलमा ४४ रन नै बनाएर भारतको इनिङ अघि बढाएपनि अन्य ब्याट्सम्यान श्रीलकन स्पिनरसामु निरिह बने ।

भ्यान्डर्सीका अलावा श्रीलकाका कप्तान चरिथा असलंकाले तीन विकेट लिएका थिए ।