काठमाडौं । स्टार स्ट्राइकर लियोनल मेसीका जेठा छोरा थियागो मेसीले नेवेल्स कपमा डेब्यु गरेका छन् ।

इन्टर मियामी आबद्ध थियागो नेवेल्स कपको वल्ड ब्वाइजविरुद्धको खेलमा मैदानमा उत्रिएका हुन् । १२ वर्षीय थियागोले १० नम्बरको जर्सीमा खेलेका थिए ।

अनौठो संयोग के भने उनका बाबु मेसीले पनि अर्जेन्टिनाको रोसारियोस्थित नेवेल्स क्लबबाटै आफ्नो फुटबलको करिअर थालेका थिए ।

वल्ड ब्याइजसँगको उक्त खेलको दोस्रो हाफमा थियागो वैकल्पिक खेलाडीका रूपमा मैदान प्रवेश गरेका थिए । सोही खेलमा उरुग्वेका स्ट्राइकर लुइस सुवारेजका छोरा बेन्जामिनले पनि खेलेका थिए । तर उनीहरूको टिम १–० को गोलान्तरमा पराजित भयो ।

थियागोको आमा र परिवारका केही सदस्यले प्रत्यक्ष उपस्थित भएर खेल हेरे पनि मेसी भने अनुपस्थित भएको अन्तर्राष्ट्रिय सञ्चारमाध्यमहरूका समाचारमा जनाइएको छ ।