काठमाडौं । एनपिएलकाे एलिमिनेटरमा कर्णाली याक्सले चितवन राइनोजलाई १७६ रनको फराकिलो लक्ष्य दिएको छ ।

त्रिवि क्रिकेट मैदान कीर्तिपुरमा पूरै २० ओभरमा ६ विकेटको क्षतिमा कर्णालीले १७६ रनको सुविधाजनक योगफल बनाएको हो ।

कर्णालीको सुधारिएको आजको खेलमा दुई खेलाडीले अर्धशतक बनाए । जयकिसन कोल्सावाला र विलियम बोसिस्टोले क्रमशः ३९ र ३७ बल सामना गर्दै अर्धशतक पारी खेलेका हुन् ।

अर्का ब्याटर चाडविक वाल्टन अर्धशतकबाट मात्रै ५ रन टाढा रहे । २१ बलमा चार चौका र ३ छक्का हिर्काएका उनी ४५ रन जोडेर अविजित रहे । जिसन मक्सुदले १४ रन बनाए पनि यसबाहेकका कर्णालीका अन्य ब्याटर लयमा देखिएनन् । गुल्सन झा र रित गौतम एक रन पनि नजोडी आउट भए ।

बलिङतर्फ चितवनका सोहेल तनभिरले २ तथा कुशल मल्ल, शरद भेषावकर र रवि बोपाराले समान १/१ विकेट लिए ।