काठमाडौं । रियल म्याड्रिड च्याम्पियन्स लिगको फाइनलमा पुगेको छ । गएराति सम्पन्न दोस्रो लेगअन्तर्गतको खेलमा इंग्लिस क्लब म्यानचेस्टर सिटीलाई हराउँदै रियल फाइनलमा पुगेको हो ।

रियलले ३ गोल गर्दा म्यानचेस्टर सिटीले मात्रै १ गोल गर्न सक्यो । पहिलो लेगमा भने रियले ४–३ गोल अन्तरमा म्यानचेस्टर सिटीसँग पराजित भएको थियो ।

पहिलो हाफमा दुवै टिमले बराबरी खेलेकोमा दोस्रो हाफको ७३ औं मिनेटमा म्यानचेस्टर सिटीका रियादले गोलको खाता खोल्दै अग्रता दिलाएका थिए । तर ९० औं मिनेटमा रोड्रिगोले गोल गरेर खेललाई बराबरीमा ल्याए । त्यसपछि इन्जुरी समयमा रेड्रिगोले अर्को गोल थपेर रियललाई अग्रता दिलाए । अतिरिक्त समयको पाँचौं मिनेटमा करिम बेन्जेमाले पेनाल्टीमा गोल गरेर रियलको जित सुनिश्चित गरे ।

योसँगै रियल ६–५ गोल अन्तरको जित हासिल गर्दै च्याम्पियन्स लिगको फाइनलमा पुगेको छ । फाइनलमा रियलको प्रतिस्पर्धा लिभरपुलसँग हुनेछ ।