काठमाडौं । सुदूरपश्चिम डडेल्धुराको परशुराम नगरपालिका हाँक्ने जिम्मा योपटक युवाले पाएका छन् । गठबन्धनभित्रै एक अर्काका प्रतिस्पर्धी रहेका कांग्रेस र माओवादी केन्द्रका युवा उम्मेदवारलाई मतदाताले मेयर र उपमेयर निर्वाचित गरेका छन् ।

मेयरमा नेपाली कांग्रेसका उम्मेदवार भरत बडायर जोशी निर्वाचित भएका छन् । उपमेयरमा माओवादी केन्द्रकी विमलाकुमारी बोहोरा निर्वाचित भइन् ।

यी दुवै युवा हुन् । मेयरमा विजयी जोशी २८ वर्षमा प्रवेश गरेका छन् । उपमेयर बोहोरा ३१ वर्षकी भइन् ।

जोशीले ५ हजार ९४१ मत ल्याएर माओवादीका उम्मेदवार शेरसिंह माल डायमण्डलाई पराजित गरे । डायमण्डले ५ हजार ८०५ मत ल्याए । एमालेका उम्मेदवार केशव बोहराले २ हजार ६०६ मतसहित तेस्रो स्थानमा सीमित भए ।

त्यस्तै उपमेयरमा बोहोराले ५ हजार ८८५ ल्याएर कांग्रेसकै कलावती बोहोरा हराइन् । कलावतीले ४ हजार ५९३ मत प्राप्त गर्दा तेस्रो भएकी एमालेकी गोमती पन्तले ३ हजार २९६ मत ल्याइन् ।