काठमाडौं । देशभर कांग्रेस र एमालेबीच दुष्मनीयुक्त चुनावी प्रतिस्पर्धा भइरहँदा झापामा भने फरक अवस्था देखिएको छ ।

राप्रपालाई हराउन झापाको कचनकवलमा यसपटक कांग्रेस–एमाले गठबन्धन मिले । अघिल्लोपटक पनि जितेको राप्रपालाई यसपटक हराएरै छोडे । कांग्रेसले अध्यक्ष र एमालेले उपाध्यक्ष जितेका हुन् ।

अध्यक्षमा कांग्रेसका कालेन्द्रप्रसाद सिंह राजवंशी ११ हजार ४५७ मतका साथ विजयी भए । उनका निकटतम् प्रतिस्पर्धी राप्रपाका अन्जार आलमले ६ हजार ६६७ मत पाए । तेस्रो स्थानमा आएका माओवादीले जम्मा ६६४ मत मात्रै प्राप्त गरेको छ ।

यस्तै उपाध्यक्षमा एमालेका नवराज भट्टराई ८ हजार ११३ मतसहित विजयी भएका छन् । उनका निकटतम् प्रतिस्पर्धी राप्रपाकी निमशरी राजवंशीले ६ हजार ८०२ मत पाइन् । तेस्रो भएकी माओवादीकी भागीरथा अधिकारीले १२५७ मत ल्याइन् ।