काठमाडौं । नेपाली कांग्रेसका सभापति एवं प्रधानमन्त्री शेरबहादुर देउवाको घर रहेको बुढानीलकण्ठ नगरपालिकामा कांग्रेसलाई पराजित गर्दै एमालेका उम्मेदवार विजयी भएका छन् ।

मेयरका उम्मेदवार मिठाराम अधिकारीले १४२५० मत ल्याएका छन् भने उनका प्रतिद्वन्द्वी कांग्रेसका विनोद चालिसे ११५१२ मत ल्याए ।

त्यस्तै उपमेयरमा १४३१४ मतका साथ एमालेकै अनिता लामा विजयी भएकी छन् । प्रतिद्वन्द्वी नेपाली कांग्रेसकी रमिला वाग्लेले ११९७२ मत ल्याइन् । नगरपालिकाका १३ मध्ये १० वडामा एमाले विजयी भएको छ भने दुईवटामा कांग्रेस र एउटामा स्वतन्त्रले जितेका छन् ।

काठमाडौंमा अहिलेसम्म कांग्रेसले दक्षिणकाली,तारकेश्वर र किर्तिपुर जित हात पारेको छ । एमाले बूढानीलकण्ठ र टोखामा विजयी भएको छ र शंखरापुर राप्रपाले जितेको छ । अब काठमाडौं महानगर, चन्द्रागिरी, नागार्जुन, गोकर्णेश्वर र कागेश्वरीको नतिजा आउन बाँकी छ ।