काठमाडौं । सिलिन्डर ग्यास विस्फोट हुँदा कांग्रेस नेता चन्द्र भण्डारी घाइते भएका छन् ।

बुद्धनगरस्थित निवासमा गएराति ग्यास सिलिन्डर विस्फोट हुँदा नेता भण्डारीसहित उनकी आमा घाइते भएका हुन् ।

नेता भण्डारी आमासहित परिवारका सदस्यसँग उक्त निवासमा केही वर्षदेखि बस्दै आएका थिए । विस्फोटका बेला परिवारका अन्य सदस्य त्यहीँ थिए वा बाहिर,  प्रहरीले केही खुलाएको छैन ।

प्रहरी प्रवक्ता प्रहरी नायब महानिरीक्षक पोषराज पोखरेलले घटना लगत्तै प्रहरी टोली घटनास्थल पुगे पनि विस्तृत विवरण आफूसमक्ष आइनसकेको जानकारी दिए ।

घाइते भण्डारी र उनकी आमाको अहिले कीर्तिपुरस्थित वर्न अस्पतालमा उपचार चलिरहेको छ ।

विस्फोटबाट भण्डारीको आमालाई सबैभन्दा धेरै असर गरेको बताइएको छ ।  उनको शरीरको करिब ७० प्रतिशत भाग जलेको चिकित्सकको भनाइ उद्धृत गर्दै भण्डारीको सचिवालयले जनाएको छ । भण्डारीको पनि शरीरको २५ प्रतिशत भागमा असर पुगेको छ । प्रवक्ता पोखरेलले भण्डारीको अवस्था खराब रहेको नेपालवाचसँग बताए ।

कसरी भयो घटना ?

घटनालगत्तै भण्डारीको निवास पुगेको प्रहरीले यसबारे अनुसन्धान थालेको छ ।

प्रहरीको अनुसन्धानले असावधानीका कारण घटना हुन पुगेको देखाएको छ । प्रहरीका अनुसार, भण्डारीको किचनमा रहेको ग्यास पहिलेदेखि नै खुला छाडेको भेटिएको छ ।

पहिलेदेखि नै भुलवश खुला रहेको ग्यास असावधानीवश खोल्न लाग्दा उक्त घटना हुन पुगेको प्रहरी प्रवक्ता प्रहरी नायब महानिरीक्षक पोषराज पोखरेलले नेपालवाचलाई जानकारी दिए ।

‘उहाँहरूको किचन रूममा पहिले नै बिर्सिएर ग्यास खुला छाडिएको रहेछ । तर उहाँहरूले थाहा पाउनुभएन र ग्यास बाल्नुभयो । त्यसैक्रममा एक्कासि ग्यास विस्फोट भयो,’ प्रवक्ता पोखरेलले बताए ।

विस्पोटबाट पुगेको क्षतिलगायत अन्य विस्तृत विवरण आउन भने बाँकी रहेको पोखरेलले जानकारी दिए ।