काठमाडौं । काठमाडौं उपत्यकामा द्रुत बस सेवा सुरु भएको छ ।

सरकारले संविधान दिवसको अवसर पारेर काठमाडौंको रत्नपार्कस्थित शान्तिबाटिकाबाट द्रुत बस सेवाको शुभारम्भ गरिएको हो ।

भौतिक पूर्वाधार तथा यातायात मन्त्री प्रकाश ज्वालाले द्रुत बस सेवाको उद्घाटन गरेका हुन् । द्रुत बस सेवा सूर्यविनायक–रत्नपार्क रुटमा चल्ने छ ।

उद्घाटनको दिन द्रुत सेवाका बसमा भौतिक पूर्वाधार तथा यातायात मन्त्री प्रकाश ज्वाला, बागमती प्रदेशका यातायात मन्त्री लक्ष्मण लम्साल, काठमाडौं महानगरपालिकाका मेयर बालेन शाह तथा मध्यपुर थिमि र सूर्यविनायक नगरपालिकाका मेयरहरु चढेर यात्रा गरेका छन् ।

यात्रुहरुका लागि भने बिहीबारदेखि मात्रै द्रुत बस सेवा सञ्चालन हुने छ । अब रत्नपार्कबाट सूर्यविनायक पुग्न ४५ मिनेट लाग्ने छ।

माइतीघर, कोटेश्वर, जडीबुटी जस्ता ट्राफिक जाम बढी हुने स्थानहरुमा पनि द्रुत सेवाका बसहरु रोकिनु नपर्ने गरी ट्राफिक प्रहरीले सहयोग गर्नेछन् ।