काठमाडौं । नेपाली कांग्रेसका महामन्त्री गगन थापाले बालकुमारी घटनामा भौतिक पूर्वाधार तथा यातायातमन्त्री प्रकाश ज्वालाको लापरबाही देखिएको बताएका छन् ।

प्रतिनिधि सभाको राज्य व्यवस्था तथा सुशासन समितिको सोमबारको बैठकमा थापाले ‘त्यहाँ घटना हुँदैछ भन्ने थाहा पाउँदा पाउँदै यो जबरजस्ती हो । चरम लापरवाही हो, हेपेको हो । सामान्य व्यक्तिले गर्ने लापरवाहीले त कतिथोक व्यहोर्नुपर्छ । त्यत्रो ओहोदामा रहेको व्यक्तिले गरेको लापरवाहीले गर्दा यत्रो ठूलो दुर्घटना भयो ।’ उनले मन्त्री ज्वालाले गरेको यो लापरबाही छानबिन समितिले हेर्छ कि हेर्दैन भन्दै प्रश्न गरेका छन् ।

बैठकमा थापाले रोजगार अनुमति प्रणालीमा देखिएको समस्याबारे श्रम तथा रोजगार मन्त्रालय र प्रधानमन्त्री कार्यालय पनि चुकेको बताएका छन्।

साउनदेखि देखिएको इपिएसको समस्या सम्बोधन नगरेर श्रम मन्त्री शरदसिंह भण्डारीले र यो विषयमा एकपटक पनि छलफल नगरेर प्रधानमन्त्री तथा मन्त्रीपरिषद् कार्यालयले गम्भीर लापारबाही गरेको उनले बताए।