काठमाडौं। बाँसबारी छाला तथा जुत्ता कारखाना लिमिटेडको सरकारी जग्गा हिनामिना गरेको आरोपमा पक्राउ परेका अरुणकुमार चौधरीसहित ३ जनालाई प्रहरीले आज छाड्ने तयारी गरेको छ।

बाँसबारी छाला तथा जुत्ता कारखानाको सरकारी जग्गा हिनामिना गरेको प्रकरणको अनुसन्धान गरिरहेको प्रहरीको केन्द्रीय अनुसन्धान ब्यूरो (सीआईबी)ले उनीहरु ३ जनालाई छाड्ने तयारी गरेको सीआईबी स्रोतले बताएको छ।

पक्राउ परेका चौधरीसहित बाँसबारी छाला जुत्ता कम्पनीका पूर्वअध्यक्ष अजितनारायण सिंह थापा र सञ्चालक समितिका अध्यक्ष सञ्जय ठाकुरलाई हाजिर जमानीमा छाड्न लागिएको हो।

काठमाडौँ जिल्ला अदालतका न्यायाधीश यज्ञप्रसाद आचार्यको एकल इजलासले सोमबार दिएको आदेशअनुसार उनीहरूलाई रिहा गर्न लागिएको हो। आचार्यको इजलासले ‘२५ दिनभित्र नै हिरासतमा राखेर अनुसन्धान गर्नुपर्ने अवस्था नदेखिएको’ भन्दै थप बुझ्नुपर्ने भए दुई दिनभित्र बाँकी काम सम्पन्न गर्नू भन्ने आदेश गरेपछि प्रहरीले आज तीन जनालाई छाड्ने तयारी गरेको हो ।

मुलुकी अपराध संहिताको दफा १५ मा कुनै व्यक्तिलाई हिरासतमा राखिरहनु आवश्यक नदेखिए सरकारी वकिलको सहमतिमा अनुसन्धान अधिकृतले हाजिर जमानी वा तारेखमा छाड्न सक्ने व्यवस्था छ । अदालतको आदेशपछि प्रहरीले यही दफामा टेकेर तीन जनालाई छाड्न लागेको सीआईबीले जनाएको छ। यद्यपि थप अनुसन्भान भने जारी रहनेछ।