काठमाडौं । कायममुकायम प्रधानन्यायाधीश प्रकाशमान सिंह राउतलाई आज प्रधानन्यायाधीशमा नियुक्त गर्ने तयारी गरिएको छ । राउतले आजै पद तथा गोपनीयताको शपथ लिनेछन् ।

प्रधानन्यायाधीश विश्वम्भरप्रसाद श्रेष्ठ असोज १८ बाट अवकाशमा जाने भएपछि संवैधानिक परिषद्को गत भदौ ३१ गतेको बैठकले राउतलाई प्रधानन्यायाधीशमा सिफारिस गरेको थियो । संसदीय सुनुवाइ समितिले १६ असोजमा राउतको नाम अनुमोदन गरेपछि उनलाई प्रधानन्यायाधीश नियुक्त गर्न लागिएको हो ।

राउतलाई राष्ट्रपति रामचन्द्र पौडेलले प्रधानन्यायाधीशमा नियुक्त गर्नेछन् । लगत्तै शीतलनिवासमा एक समारोह आयोजना गरेर आइतबार दिउँसो १ बजे उनलाई पद तथा गोपनीयताको शपथ ग्रहण गराउने कार्यक्रम छ ।

संसदीय समितिमा विभिन्न प्रश्न र आरोप सामना गरेर प्रधानन्यायाधीशमा अनुमोदन भएका राउत अबको डेढ वर्ष यो भूमिकामा रहनेछन् ।