काठमाडौं । चितवनको साहरा सहकारी ठगी गरेको अभियोग खेपिरहेका राष्ट्रिय स्वतन्त्र पार्टी (रास्वपा) का सभापति रवि लामिछानेको मुद्दा जिल्ला अदालत, चितवनका न्यायाधीश दयाराम ढकालको इजलासमा परेको छ ।

मंगलबार अदालतमा रविसहित १५ जनाविरुद्ध सहकारी ठगीको अभियोगमा मुद्दा दर्ता भएको थियो । यो मुद्दाको पेसी मंगलबार ढकालको इजलासमा तोकिएको हो ।

मुद्दा दर्ताको पहिलो नम्बरमा नै रविको नाम रहेकाले अहिले अदालतमा उनको बयान सुरु भएको छ ।

रविको बयान सकिएपछि थुनछेक बहस सुरु हुनेछ । सरकारी वकिल, जाहेरवालाको वकिल र रविको पक्षका वकिलबीच थुनछेक बहस सकिएपछि अदालतले साधारण तारिख र धरौटीमा छाड्ने या पुर्पक्षका लागि कारागार चलान गर्नेमध्ये कुनै एक निर्णय लिनेछन् ।

देशभरका पाँच वटा सहकारी ठगी गरेको अभियोग खेपिसकेका लामिछाने तीन वटा अदालतबाट धरौटीमा रिहा भइसकेका छन् ।