बागमती । पूर्व पश्चिम राजमार्गअन्तर्गत मकवानपुरको मनहरी गाउँपालिका–६, सुनाचुरीस्थित सडकखण्डमा आज बिहान यात्रुवाहक बस दुर्घटना हुँदा १६ जना यात्रु घाइते भएका छन् ।

लु२ख ५९९ नम्बरको बस सडकबाट करिब १० मिटर तल खसेर दुर्घटना हुँदा बसमा सवार १६ जना यात्रु घाइते भएको जिल्ला प्रहरी कार्यालय, मकवानपुरले जनाएको छ ।

घाइतेहरूको उद्धार गरी उपचारका लागि चितवन अस्पतालतर्फ पठाइएको उक्त कार्यालयका प्रवक्ता श्यामु अर्यालले जानकारी दिए ।

बस चालक बाराको कोल्बी नगरपालिका–११ निवासी २९ वर्षीय राकेश चौधरीलाई नियन्त्रणमा लिई अनुसन्धान भइरहेको प्रहरीले जनाएको छ ।

यसैबीच, कुलेखानी–भीमफेदी–काठमाडौं सडकखण्डअन्तर्गत मकवानपुरको भीमफेदी गाउँपालिका–४, निबुवाटारमा गुडिरहेको कारमा आगलागी भएको छ ।

काठमाडौंबाट हेटौंडातर्फ जाँदै गरेको जीज १२ डीए ९६१८ नम्बरको भारतीय कारमा आगलागी भएको हो । आगलागीबाट कार पूर्ण रूपमा जले पनि मानवीय क्षति भने भएको छैन ।